Гостиварската уметница Исмане Мехди со изложба во КИЦ Скопје

Вчеравечер во Изложбениот салон на Културно информативниот центар во Скопје, беше отворена самостојна изложба на младата уметница од Гостивар, Исмане Мехди. Таа пред публиката се претставува со дваесетина дела работени во техника на платно, а изложбата е насловена „Симфонија на боите на универзумот“. Ова е четврта самостојна изложба на Мехди, која освен во земјава, изложувала и во Турција.

„Уметноста секогаш ќе остане глобален симбол на надеж, љубов, мир и афирмација, нешто  што ќе понуди моменти на утеха и ќе не‘ оттргне од моменталната ситуација со која се соочуваме. Бескрајна благодарност до Бехиџудин Шехапи историчарот и љубител на ликовната уметност за неговата критика, којашто ќе го шета светот заедно со моите дела. Исто така, бескрајна благодарност до организаторите на КИЦ-Скопје и Скопје Сити за поддршката.“, вели уметницата.

Исмане Мехди е родена 1990 година во Гостивар. Дипломирала на Факултетот за ликовна уметност при Државниот Универзитет во Тетово, оддел сликарство во класата на проф. Решат Ахмети. Член е на Здружението на ликовни уметници ДРАУДАКУМ. Работи како професор по ликовна уметност во училиштето „Исмаил Ќемали“ во Гостивар.