Гостиварски „Комуналец“ тврди дека поранешната локална власт срушила објект-донација во Вруток

„Со донација од Финска во соработка со општина Гостивар на изворот на реката Вардар во Вруток, беше изградена куќичка каде според проектот се предвидуваше да се формира Инфо-центар за информирање на туристите за биолошката разновидност на општина Гостивар, со цел привлекување туристи и развој на руралниот туризам. После преземањето на локалната  власт од страна на ДУИ, овој објект е срушен не земајќи ја предвид целта за која беше изграден, т.е. развивање на руралниот туризам, исто така и немање на потребен респект кон странските донации кои и така едвај стигнуваат до општина Гостивар. Вредноста на оваа донација според проектот е 25 илјади американски долари, а е срушен без да го добие потребното внимание за целта за која што беше изграден, развивање на руралниот туризам во општина Гостивар“, изјави на денешната прес конференција портпаролот на ЈП Комуналец, Миртезан Селими.

Тој нагласи дека целта на проектантот била управувањето со објектот да биде дадено на јавното претпријатие „Комуналец“ кое би вработило и водич кој ќе ги информира туристите.

„Ова е класичен пример на лошо менаџирање со институциите во општината.“, рече Селими.

На новинарско прашање „Што на тоа земјиште има сега и дали нешто друго е изградено на местото на објектот“, Селими не можеше да даде прецизен одговор.