Грција денеска ги отвора плажите – правилата се строги

Спортот, музиката и алкохолот ќе бидат забранети на плажите, а според советите на научниците, поради физичката оддалеченост, ќе бидат дозволени само 40 лица на 1.000 квадратни метри.

Чадорите ќе треба да бидат оддалечени најмалку четири метри, со само две лежалки, а во рестораните и баровите на плажите, каде на персоналот им се препорачува да носат маски, ќе може да се земе храна и пијалоци само за носење.

За непочитување на овие препораки, предвидени се парични казни од 5 до 20.000 евра, кои ќе бидат тројно поголеми ако се повтори делото, најави заменик-министерот за безбедност Никос Хардалиас, додавајќи дека компаниите кои не го почитуваат законот, ќе бидат затворени прво на 30, а потоа на 90 дена.

Грчкото Министерство за поморски работи објави и серија мерки за безбедно пловење со грчки бродови, за време на летниот период по Ковид-19. Мерките стапуваат во сила од понеделник, 18 мај.

Објавата на Министерството вклучува низа упатства за превенција и третман на случај „Ковид-19“ кои ќе важат за сите пловни објекти кои пловат под грчко знаме.