ЈП Ринија доби 1 милион денари субвенции за да подмири долгови за струја и плати

Советот на Општина Гостивар на вчерашната седница донесе одлука за доделување на субвенции за Јавното претпријатие „Ринија“ кое стопанисува со спортската сала „Младост“. Финансиската инјекција, во висика од еден милион денари е наменета за подмирување на долгови за неплатени сметки за електрична енергија и плати на вработените.

Од претставник од претпријатието беше образложено дека долгот за струја е 800 илјади денари, додека за плати, околу 300 илјади.

Шптим Џелили, координатор на советничката група на ДУИ побара на наредната седница, ЈП „Ринија“ да достави документи со кои ќе докаже дека средствата се искористени за намената за кои се доделуваат. „До сега, повеќепати сме гласале субвенции за ова претпријатие. Ние како советничка група сме за да се помогне претпријатието, но бараме следен пат, директорот или претставник да достават документи, да имаме доказ дека струјата е навистина платена.“, рече Џелили.