КК Гостивар го преслуша шампионот МЗТ Скопје по вторпат 88-69

Кошаркарскиот клуб Гостивар пред своите навивачи во Спортската сала Младост му го нанесе и вториот пораз на актуелниот шампион МЗТ Скопје сезонава, совладувајќи го вечерва, со резулат 88-69.

Почетокот на натпреварот донесе слаба ефикасност и поприлично резервирана игра на двете страни, гостите успеаа да го добијат првиот период (16-20), во вториот и поведат 29:38, но гостиварци стиснаа заби и успеаа натпреварот да го вратат на почеток. На полувреме се замина со изедначен резултат 40:40.

Во вториот дел кошаркарите на Гостивар започнаа да наметнуваат свое темпо, добивајќи го третиот период (20-15), за во последните 10 минути на бранителот на титулата му приредат тотален „распад-систем“, надигрувајќи ги во сите сегменти на кошаркарската игра, за конечни 88-69.

Грузиецот Корсантија со 21 поен, 13 скокови 7 украдени топки беше убедливо најкорисен поединец на натпреварот. Пипкинс беше најдобар стрелец со 25 поени, Ефремовски и Вучковиќ постигнаа по 14, Митевски 9 поени.

Кај МЗТ Скопје Александар Бурсач беше најефикасен со 16 поени.