Кои фирми ги добиле тендерите на општина Гостивар лани?

Скоро половина од тендерите на општина Гостивар во 2017-та година ги добила една фирма. Станува збор за нафтената компанија „Пуцко петрол“ од Пласница, на која лани и припаднале 48,2% од општинските јавни набавки, со вкупна вредност од над 46 милиони денари. На второ место се наоѓа Друштвото за производство, трговија, транспорт и услуги Грени од Долна Бањица, кое преку јавни набавки добило 9 милиони 250 илјади денари, а на трето е фирмата Магнум Транс на која отпаѓаат 6,1% од тендерите со вредност од 5 милиони и 900 илјади денари.

Податоците ги објави Центарот за граѓански комуникации во Годишната база на податоци за јавните набавки на општините за 2017-та година.

Според истражувањето на Центарот, општина Гостивар лани издвоила над 96 милиони денари за јавни набавки, што е 8,7% од вкупниот лански општински буџет. Општината спровела 34 јавни набавки, а на нив потрошила 1.151 денар по жител.

Претходната, 2016-та година општината спровал 76 јавни набавки, издвоила околу 240 милиони денари од буџетот, а потрошила 2.870 денари по жител.

Базата на податоци за јавните набавки во општините Центарот за граѓански комуникации ја изработува според податоците преземени од Електронскиот систем за јавни набавки.