Комисијата препорачува затворање на кафулињата и кафеаните во 18 часот, угостителите не се согласуваат

Комисијата за заразни болести излегува со препорака за нови рестриктивни мерки. До Владата ќе биде доставен предлог за затворање на угостителските објекти во 18 часот, во периодот од 18 декември до 21 јануари, за да се спречат групирања во текот на празничните денови.

Од Независната угостителска комора не се согласуваат со ваквите препораки.

„Она што се плашавме се случи, на состанокот на Комисијата утрово бевме само гости и накратко ни кажа дека угостителските објекти ќе се затвораат во 18 часот. Ниедно од нашите барања не беше дискутирано и разгледано, претпоставувам дека беа отфрлени ад хок, одлуката беше донесена предвреме. Ниеден угостителски објект во кој се почитуваат протоколите во моментов не е извор за ширење на заразата, со исклучок на такви што не ги почитуваат протоколите“, изјави Здравко Јосифовски, претседател на комората.