Ковид вакцинацијата кај нас ќе започне со кинеските вакцини, најавени 200.000 дози

Според најавите кои денес ги даде министерот за здравство Венко Филипче  вакцинацијата против ковид во земјава ќе започне овој месец, кога се очекува да пристигнат 200.000 дози од кинеската вакцина Синофарм.

„Не би шпекулирал во однос на точниот датум, меѓутоа за многу кратко време ќе го знаеме и тоа, после што истиот ќе го објавиме. Со тоа ќе започне вакцинацијата, најпрво за приоритетните групи“, изјави министерот кој нагласи дека сите вакцини на пазарот се безбедни и како здравствена власт немаат задршка кон ниту една вакцина.

Според Национален план за имунизација на населението против ковид 19, вакцинацијата  ќе се спроведе во три фази. Во првата фаза предвидено е да се вакцинираат здравствените работници и ризичните групи: постари лица со висок ризик да развијат болест и хронично болни.

Друга пратка вакцини која е најавена за март треба да стигне преку Ковакс системот и ќе бидат од компанијата Астра Зенека.