Критична маса | ИЗБЕРИ ТОЧАК | Гостивар

Нашето општество се соочува со неколку проблеми од големи размери кои директно се поврзани со начинот на транспорт низ населените места и третманот кој различните типови транспорт го добиваат од институциите.

-Небезбедност во сообраќајот и жртви.

-Сообраќаен метеж и непријатни јавни простори.

-Здравствени проблем кај населението (проблем со загадување, недостаток од физичка активност, итн.)

Со серија мерки за развој и унапредување на урбаниот велосипедизам во градовите ќе се привлечат поголем број граѓани на велосипед во сообраќајот. Со тоа значително ќе се помогне во решавање на голем дел од проблемите со кои се соочуваме како општество: ќе се намали загадувањето, ќе се подобри јавното здравје и ќе се решат некои од најголемите градски проблеми поврзани со сообраќајниот метеж. Притоа ќе се заштедат средства од буџетите на општините, како и буџетите на министерствата за здравство, транспорт и животна средина.

Oд анализата која ја направивме на досега објавените партиски програми за парламентарните избори, решавањето на овие проблеми речиси комплетно е изоставено.
Велосипедот, доколку воопшто е спомнат, е речиси исклучиво дел од проектите за спорт, рекреација или туризам.
Крајно време е сериозно да му се пристапи на проблемот и во политиките велосипедот да се третира примарно во категоријата ТРАНСПОРТ.

Веќе подогло време активно ги актуелизираме придобивките од користењето на велосипедот, како и проблемите и решенијата поврзани со велосипедскиот сообраќај.
Затоа се почувствувавме должни да реагираме.
Заедно со другите #НаТочак организации: Битола НаТочак, Прилеп НаТочак, Гостивар НаТочак, Тетово НаТочак, Штип НаТочак, Струмица НаТочак, подготвивме документ ( http://natochak.blogspot.mk/2016/11/blog-post_24.html ) кој го испративме до политичките партии со цел да им послужи како основа за дополнување на изборните програми.

Сè уште не е доцна да направат измени, а ние предизборно ќе направиме велосипедска анализа на програмите и ќе ја споделиме со јавноста.

Будни сме, ќе следиме! Бираме точак за секој ден, но и бираме со точакот!

Оваа седмица има Критична маса со темата #ИзбериТочак во 5 града: Битола, Гостивар, Скопје, Прилеп и Струмица.

Во Гостивар се гледаме пред зградата на Општината во недела, 27. XI 2016 година, во 12:30 часот.
Ве очекуваме во што поголем број.