МРП и ХПВ вакцинацијата во Гостивар со најнизок опфат-Дебата за важноста на имунизацијата

„Дезинформациите и антивакциналните кампањи кои најчесто се шират преку социјалните мрежи придонесуваат за опаѓање на опфатот со вакцини и зголемување на ризикот од ширење на заразни болести. За вакцините граѓаните да се информираат од стручни лица, а не од интернет.“ Ова беа некои од главните поенти пренесени на денешната дебата што се одржа во Гостивар на тема Важноста на редовната имунизација. Целта беше да се покрене свеста за корисноста на вакцинацијата.

„На нашето подрачје состојбата со имунизација е задоволителна, но не е одлична. За да биде добра, да функционира таа колективна заштита на населението, треба процентот на вакцинирање да биде над 95% , во Гостивар стигнавме до 83% општо. Но, има вакцини што се со многу мал процент, населението одбива да ги прима. ХПВ е со многу мал процент околу 40% , МРП стигнавме до 73%, што е подобро, но сепак недоволно. Тие две вакцини ни се најпроблематични“, рече д-р Дафина Богдановска Влаховска од Здравствениот Дом.

Медицинските лица потенцираат дека вакцинацијата е најдобар начин на заштита на населението до заразни болести.

„Вакцините се безбедни зад нив стојат Министерството за здравство, Агенцијата за лекови, значи се проверени, ланецот за транспорт е сигурен. Граѓаните тоа мора да го сфатат. Некако повеќе им се верува на социјалните мрежи, на некои инфлуенсери, отколку на стручни лица. Сепак, тие не може да имаат повеќе познавање од стручните лица“, рече докторката Богдановска Влаховска.

Како амбасадор за промоција на имунизацијата во Гостивар е избрана Аслијан.Снопче, раководителка на Секторот за образование во општината.

„Треба да се сензибилизираат луѓето за важноста на вакцинирањето, затоа што честопати се појавуваат дилеми околу тоа: Дали треба вакцина или не. Медицината докажува дека тоа е за доброто на здравјето на сама личност, како и за доброто на целата заедница.“, кажа Снопче.

Настанот се организираше во соработка со Канцеларијата на СЗО, УНДП и Здружението „Биом“.