МВР може да забрани поднесување на барања за пасоши, немало обрасци

Министерството за внатрешни работи планира да го стави системот за закажување термини надвор од функција поради недостаток на обрасци за патни исправи.

До решавање на овој проблем ќе се издаваат пасоши во редовна постапка само за граѓани на кои им е неопходен, односно критериумите за приоритет во наредниот период ќе бидат неодложно лекуваат во странство, бизнис-активности, на работници кои работат во странство, за професорите и експертите кои треба да учествуваат  ба меѓународни конгреси, студенти во странство и слично.

„До овој момент во редовна постапка веќе има поднесено 16.500 барања за пасош. За итна постапка има поднесено 650 барања. Резерва имаме уште околу 3.600/3.700 обрасци за патни исправи. Со оглед на сериозноста на проблемот стапивме во контакт со компанијата Веридос и со германската амбасада, а изготвивме и информација до Владата. Баравме Владата да најде начин за надминување на состојбата со оглед на тоа што се работи веќе за проблем на ниво на држава, но не наидовме на разбирање. Владата го врати проблемот на решавање во МВР. Денес ќе имаме нови обиди за наоѓање решение, ќе разговараме и за методологијата, која е при крај, приоритет ќе имаат здравствените случаи, таква е состојбата во моментот“, рече министерот Чулев, на денешната прес конференција.

Новата набавка на пасоши се очекува на 24 март.