На онлајн час по англиски со професорката Амети во гимназијата во Гостивар…

Клупите и столчињата се празни. Во училницата е само професорот со лап топ, учебник и белешки. Порано, тоа ќе значеше дека моментално не се одржува час, а професорот се подготвува за наредниот. Но, годинава ова е начинот на кој се изведува наставата. Часот тече онлајн, а како тоа изгледа имавме прилика да проследиме во гимназијата во Гостивар со професорката по англиски јазик Блерима Амети.

Лекцијата беше на тема семејство и семејни стебла. Професорката воспоставуваше комуникација со учениците кои беа вклучени на часот, им објаснуваше, имаше подготвено неколку ливчиња со натписи и им ги демонстрираше, им поставуваше прашања… навидум исто како на вообичаен час со децата во училиште. Но, сепак не е така.

Онлајн наставата е голема промена во образованието и носи потешкотии и предизвици кои ќе мора постепено да се надминуваат.

„Јас лично прво имав потешкотии со креирање на класот, главниот проблем не беше во самото креирање, туку со тие пасворди што им беа доделени на учениците. Тие не знаеја како да се регистрираат и на тоа дополнително работевме два-три дена. Потоа требаше да им се објасни како функционира сето тоа, затоа што апликацијата е на англиски јазик. За нас кои знаеме англиски е многу лесно, но за учениците, па и за некои колеги кои не ги знаат тие изрази и термини, тоа е проблем. Сега за сега имаме потешкотии, но ако им соодветни услови, со тек на време сето тоа ќе се надмине“, рече професорката.

За училишните управи најголем проблем се обезбедувањето на соодветни електронски уреди и стабилна интернет врска, за да може наставата да се одвива непречено.

„Ние како училишта не добивме доволно време за да се подготвиме, се‘ оди набрзина. Голем предизвик е, и за мене како менаџер на училиштето и за педагошко-психолошката служба и за професорите. Но, секојдневно правиме напори, да обезбедиме услови, работиме на подобрување на интернет конекцијата во училиштето, соодветни компјутери и слично.“, изјави Мирсад Исеини, директор на гимназијата во Гостивар.

Учебната година почна пред една недела, а за досегашното искуство и доживување на онлајн наставата професорката Амети вели:

„Навистина е многу различно. Јас лично сакам да почувствувам атмосфера, ми треба фитбек од учениците, да се слушнеме добро, да се видиме. Знаете, во нашата работа изразот на лицето некогаш кажува повеќе од зборовите. Вака онлајн не ги гледам децата, само ги слушам, а понекогаш и тоа не е добро, не се слушаат како што треба. Мислам дека наставата со физичко присуство е незаменлива, но условите моментално се такви какви што се, и мора да се трудиме да дадеме максимум од себе за учениците да го добија знаењето“.

На гостиварска територија согласности за настава со физичко присуство добија само неколку училишта во селата. За останатите онлајн наставата за сега ќе биде секојдневие.