Над 6 милиони евра за обнова на патот Маврови Анови-Жировница, Бочварски и Рустеми во увид на работите

Министерот за транспорт и врски Благој Бочварски, неговиот заменик Беким Реџепи и директорот на ЈП за државни патишта Ејуп Рустеми извршија увид во работите на  регионалниот пат Маврови Анови-Дебар на делницата од М.Анови до Жировница.

Патот е со должина од 18 километри, инвестицијата е во вредност од 6,1 милион евра, средства обезбедени од ЈП за државни патишта. Предвидена е целосна рехабилитација на патниот правец и санација на осум мостови.

„Маврово но и Реканскиот дел е многу значаен регион каде е потребно да го развивме туризмот од сите аспекти, но истовремено и да ги подобриме условите за живот на граѓаните. Нашите залагања и примарен фокус е да обезбедиме подобри услови во патната инфраструктура, исто така и во делот на комуналната инфраструктура, она за што сме надлежни се со цел да го подигнеме нивото на услуги што ги нуди регионот. Покрај овој пат во годинашната програма на ЈП за државни патишта предвидена е изградба на регионален пат од Гарски мост до Извор, потоа реконструкција на патот од Гарски мост до Лазарополе како и реконструкција на транзитот ни Дебар”, изјави Бочварски.

Директорот на ЈП за државни патишта Ејуп Рустеми најави динамичен план за рехабилитација на патниот правец.

“Трасата на оваа делница всушност е продолжение на веќе рехабилитираната делница Бунец–Маврови Анови. Во наредниот период ќе се работи на еднослојна и двослојна надградба на сегменти од трасата каде што површинските оштетувања се поизразени, нова коловозна конструкција на делови од трасата каде што коловозот е во лоша состојба, предвидена е и санација на осум мостови, реконструкција, доградба и изведба на нови  потпорни ѕидови, како и поставување на нова сигнализација” изјави Рустеми.

При посетата, министерот Бочварски потенцира дека во завршна фаза е изработката на проектите за изградба на пречистителна станица за Маврови Анови како и изградба на водоводен систем за населеното место Аџиевци.