Не биле арамии – ќерката со другарите го одзела накитот и режирала кражба

Секторот за внатрешни работи Тетово – Полициска станица Гостивар, ја расветли тешката кражба во куќата  на 52-годишниот гостиварец, која беше пријавена вчера наутро.

Од таму соопштуваат дека осомничена како сторител на кражбата е малолетничка со нецели 18 години, ќерка на сопственикот на куќата.

Како што наведуваат од полицијата, осомничената, вечерта од регал во дневната соба го зела училишниот ранец во кој имало кутија со разновиден златен накит (ќустек, нараквици, ѓердан и друго) и преку прозорецот им го фрлила на двајца нејзини другари на возраст од 17 години, кои чекале во дворот. Лапотопот кој, исто така, бил пријавен дека е одземен, го ставила на друго место, по што вчера наутро исценирала пребарување низ просториите.

Осомничената и двајцата малолетници биле повикани во Полициската станица Гостивар, каде било разговарaно со нив и сето украдено е пронајдено и вратено.

По целосното рачистување на сите поединости, во консулатација и координација со јавен обвинител, ќе следува соодветен поднесок, најавуваат надлежните.