Нема да молчам! Трибина во Гостивар за борбата против насилството врз жените

Во рамки на меѓународната кампања „16 дена активизам против родово базираното насилство“ попладнево во Гостивар се одржа тркалезна маса на која се зборуваше за семејното насилство, состојбите со оваа појава на подрачјето и начините како да им се излезе во пресрет на жените жртви. Настанот го организираше координаторката за еднакви можности од Општина Гостивар, Азра Нуредини во соработка со Националниот совет за родова рамноправност.

„Целта на кампањата за 16 дена активизам е да се промовира СОС линијата 141-700 на која секој што се соочува со насилство, односно е жртва да го пријави. Линијата е бесплатна и функционира 24/7, а ќе продолжи да работи и по завршување на кампањата“, истакна Нуредини.

Во насока на што поголема поддршка и помош за жртвите на семејно насилство, Општина Гостивар разгледува можности за отворање на шелтер центар за нивно згрижување.

„Општина Гостивар постојано ги поддржува активностите кои се врзани со борбата против семејното насилство. Се надевам дека еден од проектите кои ќе успееме да ги спроведеме во 2023 година, заедно со сите невладини организации кои дејствуваат на ова поле е отворање на засолниште за жртвите на родово насислтво“, рече претседателот на Советот на Гостивар, Валбон Лимани.

На трибината пред присутните говореше и претседателката на Националниот совет за родова рамноправност, Савка Тодоровска, која повика жртвите да не молчат и да не го кријат насилството.

„Насилството над жената е едно зло кое можеби условно речено е стереотипно, жените сметале дека треба да го трпат и од таа причина не се говореше, се молчеше и самите жени го прифаќаа како „тоа ми е така пишано од природата“. Сметале дека треба да го трпат и да не го кажуваат ни на најблиските, а камо ли на институциите. Затоа нашата кампања е под мотото Нема да молчам!“, подвлече Тодоровска.

На настанот присуствуваа претставници од институции, организации, бизнис секторот и др.