Новогодишен базар со хуманитарна нота во гостиварското техничко училиште

Деновите пред Новата Година средношколците и професорите од техничкото училиште во Гостивар ги искористија да внесат празнична атмосфера во училиштето со поставување на декорации, елка, пишување новогодишни желби и слично. Денес пак, во холот се организираше „Новогодишен базар“ со хуманитарен карактер.

На штандови беа изложени новогодишни украси изработени од учениците, кои се продаваа, а собраните средства ќе бидат донирани.

„Нашето училиште традиционално организира Новогодишен базар со цел заедно да се дружиме, да се забавуваме, да размениме позитивна енергија. Имаме храна подготвена од професори и ученици, а исто така поставено е и пано на кое се оставени новогодишни желби од учениците. Лично би посакала во Новата Година да бидеме сите среќни, да излеземе од стегите, од стравот, да имаме позитивни мисли, да нема војни, едноставно да живееме во мир и убаво“, рече професорката по македонски јазик, Гордана Страшевска.

Настанот се заврши со симболично пуштање во воздухот на хелиумски балони на кои беа испишани пораки за мир, соживот, братство, љубов…