Од 5.000 до 30.000 евра за проекти од Reload во Гостивар, во подготовка е јавниот повик

Јавниот повик за поддршка на проекти во рамки на Reload програмата за Гостивар ќе биде објавен кон крајот на годината, а во подготвителната фаза денес се организираше дебата со граѓанските организации. Целта е да се одредат приоритетите, односно кои области да бидат опфатени со проектните активности.

Невладините преку Reload програмата, спроведувана од УНДП и Општина Гостивар, имаат можност да добијат од 5.000 до 30.000 евра за реализација на проекти, како и менторска поддршка при аплицирањето.

„Ова е втората фаза за која веќе имавме прв повик на кој добивме 19 апликации. Од нив само три поминаа и започнаа со активностите. Вториот јавен повик очекуваме да биде објавен кон крајот на годината и за таа цел на јавна дебата со граѓанските организации ги дефинираме приоритетите кои ќе бидат дел од повикот, кој ќе се организира кон крајот на годината. Веруваме дека ќе имаме доволно апликации и квалитетни проекти. Во делот на процесот на изготвување на пликации сите организации ќе бидат поддржани од ментор од УНДП, ќе има посебни обуки, менторство, добра поддршка.“, изјави Дашмир Османи од Општина Гостивар.

Регионалната програма за локална демократија на Западен Балкан (Reload), има за цел да ја зајакне партиципативната демократија и интеграцијата на Западен Балкан во Европската Унија.