Од понеделник поголемо полициско присуство околу училиштата во Гостивар

Секторот за внатрешни работи Тетово информираше дека ги финализира планираните сообраќајно-превентивни подготовки, пред почетокот на новата учебна година во гостиварското и во тетовското подрачје.

„Деновиве извршени се повеќе таканаречени теренски извидувања на улиците и тротоарите кои водат кон училиштата, во функција на навремено отстранување на сите пречки во заедничка активност со локалните самоуправи и јавни претпријатија (изложени производи, оставени хаварисани возила или други предмети) за нормално и безбедно движење на учениците. Покрај ова, а во координација со локалните самоуправи, исто така, се проверува исправноста на сообраќајната сигнализација и се обновуваат обележаните пешачки премини пред и во близина на училиштата.“, стои во соопштението од полицијата

Со стартот на учебната година најавено е поголемо полициско присуство околу училиштата во Гостивар и во Тетово, посебно за време на одморите и на почетокот и по завршување на училишните смени. Поголемо присуство ќе се практикува и на автобуските постојки кои ги користат учениците.

Секторот за внатрешни работи апелираше возачите да бидат максимално внимателни, да ја прилагодат брзината кога се движат во близина на училиштата, задолжително да застануваат пред пешачките премини, да им даваат предност на учениците-пешаци и да ја почитуваат поставената сообраќајна сигнализација.