Општина Гостивар организира акција за семејствата погодени од земјотресот во Албанија

Во знак на солидарност со граѓаните погодени од силниот земјотрес во соседна Албанија, Општина Гостивар организира хуманитарна акција за помош.

Од општината ги повикаа гостиварци да се приклучат во акцијата и да донираат материјална помош за семејствата коишто претрпеа огромни штети. Донациите треба да се достават во објектот на Противпожарната служба на Гостивар, во форма на:

прехранбени производи (брашно, масло, ориз, сол, шеќер, конзервирана храна, детергенти и средства за хигиена), ќебиња, вреќи за спиење / душеци, перници, лекови, шатори за привремено сместување со капацитет од 5-10 лица и комплети за прва медицинска помош.

Хуманитарната акција ќе се спроведува од утре, среда (27 ноември) во 8 часот, до четврток (28 ноември) во 12 часот.

„Се надеваме дека оваа акција ќе биде што е можно поуспешна и ќе ја ублажи болката на погодените семејства. Албанија ние сме со тебе!“, стои во соопштението.

Поради трагедијата од природната непогода, знамињата во Гостивар се спуштени на половина копје, а општината ги откажа настаните по повод Денот на албанското знаме. Тим пожарникари од Гостивар е испратен да пружа помош на терен во Драч, а општината донираше 300 ќебиња.