Светиот крст за Водици во Гостивар во рацете на Павел Давидоски!

Павел Давидоски од Гостивар имаше најмногу среќа и го фати светиот крст во водите на Вардар на прославата на Богојавление Водици во Гостивар.

Белата снежна покривка уште повеќе ја разубави празничната атмосфера, а ниските температури не ги спречија гостиварци масовно да бидат дел од годинешната манифестација.

Прославата на Водици започна утрово со света литургија во соборниот храм „Пресвета Богородица“, во срцето на Гостивар.  Голем број верници беа дел од литијата што по богослужбата, тргна од црквата и преку централното градско подрачје се движеше до малиот мост на Вардар. Од таму митрополитот тетовско-гостиварски г.Јосиф го изврши чинот на осветување и го положи светиот крст во реката.

Ова е трета година по ред како Богојавление во Гостивар се слави со положување на крстот во реката Вардар. Традицијата после речиси седум децении пауза беше возобновена на радост и задоволство на верниците кои масовно ја поддржуваат.