Пилешко бурито, Мексиканците знаат што е добар залак…

Направете брз и интересен оброк кој секој ќе го сака. Трикот за добро бурито е само во зачините. Ви ја откриваме тајната на овој оброк.

Потребно ви е едно поголемо пилешко филе исечкано на коцки. Додадете 1/2 лажичка ким, 1/2 лажичка толчена слатка пиперка и 1 лажица маслиново масло. Добро измешајте и оставете околу 20 минути.

Во тава со малку масло пропржете 1 поголем кромид ситно исечкан. Кога кромидот ќе стане карамелизиран, додадете го пилешкото и пропржете сè заедно со повремено мешање околу 5 минути.

По 5 минути пржење додадете 200 гр излупени домати исечкани на парчиња и 2 лажици скара зачин (или мексикански зачин). Додадете сол и бибер по вкус и измешајте со малку сечкан свеж магдонос.

Кога вишокот вода ќе испари, исклучете ја ринглата, а потоа додајте и измешајте 1 чаша црвен пастеризиран грав. Во меѓувреме загрејте ги тортиљите, премачкајте ги со павлака и филувајте со подготвениот фил.

Послужете топло.