Дневно на подрачјето на Гостивар се создаваат околу 47 тони отпад

На гостиварското подрачје со создаваат околу 17.200 тони отпад на годишно ниво, што е околу 47 тони дневно. Податоците кои се наведени во Програмата за работа на Јавното претпријатие Комуналец-Гостивар, покажуваат дека најголемиот дел од ѓубрето или 61%, отпаѓа на органски отпад (храна и биоразградлив отпад), 8% се хартија и картон, исто толку градежен шут, 7% пластика, 4% метали и друго.

Комуналец го собира и транспортира отпадот на депонијата Русино со десет возила. Претпријатието врши услуги за над 67 илјади жители од градот и околните села Здуње, Равен, Вруток, Беловиште, Балиндол и други.

За складирање на комуналниот отпад граѓаните имаат на располагање 320 контејнери, поставени на 135 локации. Нив ги користат 35% од жителите и тоа најчесто од станбените блокови, додека оние кои живеат во куќи користат пластични канти, кои ги има околу 13 илјади на број.

Во програмата на Комуналец стои дека годинава планирана е набавка на 50 нови контејнери, како и 5 нови еко контејнери за селекција на пластика и хартија.