Полицијата удри по неправилно паркираните возила низ гостиварските улици

Гостиварското одделение за внатрешни работи во изминатите неколку дена значително ги засили активностите за поголем ред и безбедност со паркирањето во градот и пред се во неговото централно подрачје. Заклучно со денеска (4 февруари) биле изречени вкупно 67 мерки, од кои само вчера (3 февруари) 20 мерки, кои претежно се однесувале на непрописно, односно погрешно паркирање.

Во овој период, исто така, најмногу на улиците „Браќа Ѓиновски“, на потегот од Центарот за култура „АСНОМ“ до крстосницата со „Мајор Чеде Филиповски“ и „Гоце Делчев“,  било подигнато 21 непрописно паркирано возило, најчесто во таканаречени „двојни редови“, како и возила паркирани во  близина на кружен тек и на пешачки премини, а кои го попречувале нормалното и безбедно движење на другите учесници на сообраќајот.

Овие активности ќе продолжат до крајот на месецот и при тоа ќе се санкционираат сите вакви прекршоци, не само во центраното подрачје, туку и на другите улици во Гостивар, наведуваат од СВР.