Полицијата во Гостивар на возачите им делеше летоци и освежувачи

„Ако пиеш не вози, ако возиш немој да пиеш!“, „За весели моменти, насмевки и доживувања вози одговорно!“, „За тие што те сакаат и за тие што ги сакаш, почитувај ги сообраќајните правила и прописи“, „Љубовта оправдува многу нешта, но не и загрозување на безбедноста во сообраќајот“. Вакви пораки добиваа возачите денес испишани на летоците што им ги делеа полициски службеници во Гостивар. Активноста се спроведе во рамките на заедничката кампања „Честит празник на љубовта и виното“, чии носители се Републичкиот совет за безбедност на сообраќајот на патиштата, Министерството за внатрешни работи и Факултетот за безбедност-Скопје.

Освен летоци со совети полицијата на возачите им подаруваше и освежувачи за возила.

Како што појасни портпаролот на СВР, Марјан Јосифоски, заедничка цел на оваа активност на СВР Тетово-Отсек за превенција е подигнување на сообраќајната свест и култура на возачите, дури и во највеселите-празнични и други мигови да се воздржат од управување на нивните возила под дејство на алкохол и да ја доведуваат во ризик сопствената и безбедноста на другите  учесници, возачи и пешаци.