Пред Велигден засилена контролата на јајцата и боите за вапсање

Периодов пред велигденските празнувања, Агенцијата за храна и ветеринарство ги засили инспекциските контроли за безбедноста и квалитетот на јајцата, како и на боите за вапсање.

„Покрај контролите на магацините, зајакнати контроли се спроведуваат и на граничните премини, при увоз, со цел на граѓаните да им се понуди безбеден и квалитетен производ. Секоја недоследност во поглед на овој прехранбен производ граѓаните и компаниите можат да го пријават на Агенцијата за храна и ветеринарство, врз основа на што ќе биде спроведена и инспекциска контрола”, изјави директорот на Агенцијата, Зоран Атанасов.

Интензивно се следи и производството и увозот на бои за јајца. Досега не биле евидентирани отстапувања во однос на безбедноста на увезените прехранбени бои.

Надлежните апелираат граѓаните да купуваат боја за јајца исклучиво од регистрирани производители увозници, која е соодветно означена и декларирана.

„Ги охрабруваме граѓаните секоја недоследност во однос на безбедноста на храната, вклучително и на производството и трговијата со јајца и бои за јајца, да ја пријават на бесплатниот телефонски број 080032222 или електронски на info@fva.gov.mk“, повикуваат од Агенцијата.

Според нивните податоци годинава во земјава се увезени вкупно 240.830 јајца, сите од Србија. Како небезбедни, поради несоодветно означување на рокот на употреба биле поништени 16.620.