Премиера: Актерите блеснаа, публиката воодушевена

Гостивар синоќа живееше во знакот на театарската уметност. Драмското студио „Дунек“ уште еднаш покажа дека е движечка сила на културното оживување на градот. Премиерата на „Фантомот од училишната табла“ во Центарот за култура помина успешно, со одлична изведба од страна на актерите, полна сала и добар прием од публиката.

Претставата донесе поразлична приказна од досегашните кои екипата ги работела, со потешка тема која отвора суштински прашања и допира до најделикатните аспекти на човековото живеење.  Текстот е работен според вистински настан кој се случил во Америка пред две децении и ги прикажува недостатоците и пропустите на едно општество.

На сцената ги видовме: Виктор Анѓелкоски, Живе Ристоски, Војкан Михајлоски, Драгана Богоеска, Теодора Матеска, Константина Ѓурковиќ, Теодора Волческа, Ивана Мерџаноска и Тома Стојаноски. Младите актери работеа под водство на режисерот Ѓорѓи Нешкоски.

Претставата денес ќе има уште две изведби за организирани посети од училиштата, во 12 и во 17 часот.