Премиера „Итрините на Скапен“ – се бараше столче повеќе

Аплаузи, одлична изведба, задоволна и добро расположена публика. Во ваква атмосфера помина синоќешната премиера на комедијата „Итрините на Скапен“ во Центарот за култура АСНОМ во Гостивар. Театарската екипа на Драмското студио „Дунек“ може да се пофали со уште еден успешен проект. Во салата се бараше столче повеќе, а публика имаше од сите возрасти. На сцената во секој момент од шеесетминутната претстава беше динамично, интересно и возбудливо.

„Итрините на Скапен“ работена по текст на францускиот комедиограф Молиер донесува приказна во која на комичен начин се преплетуваат љубовта, семејните односи, досетливоста на слугите и нетпреливоста меѓу благородничките фамилии. Дејствието се одвива во Неапол, Италија во 15 век.

Во претставата играат: Војкан Михајлоски, Драгана Богоеска, Живе Ристоски, Иво Дамјаноски, Ратко Анастасиевски, Станимир Трпески, Виктор Анѓелкоски, Филип Веселинов, Ивана Мерџаноска, Емилија Атанасоска, Константина Ѓурковиќ и Теодора Волческа. Режијата е на Ѓорѓи Нешкоски.

Вечерва (10-ти јуни, сабота) има репризна изведба на комедијата со почеток во 20 часот.