Претседателот на Собранието на Турција Мустафа Шентоп во посета на Врапчиште

Претседателот на Големото народно собрание на Турција, Мустафа Шентоп вчера беше во посета на Општина Врапчиште, каде оствари средба со градоначалникот Исен Шабани и учествуваше на пригодна церемонија на доделување донации, обезбедени од Унијата на општини на Турција.

Врапчиште доби багер, додека Општина Маврово-Ростуше, камион за смет.

„Турција секогаш се обидува, да им помогне на сите луѓе од овие простори, независно од нивната вера и етничко потекло. Се подразбира дека особено внимание им обраќаме на нашите сонародници. Ние постојано во мислите и со душата сме тука, живееме со нашите браќа тука и со сеќавањата од овие простори “, изјави Шентоп.

Заедно со првиот човек на турскиот парламент, во Врапчиште беше и Амбасадорката на Република Турција, Тулин Еркал Кара.

Градоначалниците на општините кои добија донации, Шабани и Медат Куртовски се заблагодарија за помошта од Турција, истакнувајќи дека добрата соработка и меѓусебни реалции ќе продолжат и во иднина.