Приведено лице поради агресија кон вработени во болницата во Гостивар

Дваесет и двегодишен жител на гостиварско село, вчеравечер бил лишен од слобода поради агресивно однесување во болницата во Гостивар. На настанот му претходела несреќа, во која бил повреден таткото на пријавениот.

Како што соопшти полицијата, вчеравечер (17 август) околу 23 часот, полициски службеници на СВР Тетово-Одделение за внатрешни работи Гостивар го лишиле од слобода 22-годишниот С.Д. од гостиварско село, кој се однесувал агресивно и се обидел физички да се пресмета со вработени во гостиварската Општа болница „Ферид Мурад“. Непосредно пред тоа, во болницата бил донесен неговиот татко С.Д. (46) за укажување на лекарска помош, откако бил повреден во сообраќајна незгода, кој според пријавеното, во меѓувреме физички нападнал вработена во болницата.

Според информации од полицијата, несреќата се случила околу 21 часот и 40 минути, на крстосницата на улиците „Гоце Делчев“ и „Илинденска“ во Гостивар и во неа учествувале патничко моторно возило „фиат добло“, со гостиварски регистарски ознаки, управувано од 27-годишниот гостиварец А.Х. и мотоцикл „санрејсер“, без регистарски ознаки, управуван од 46-годишниот С.Д. од гостиварско село.