Пуштен во употреба новиот стационар за кучиња скитници во Гостивар

Гостивар доби втор стационар за третман на бездомни кучиња. Шелтер центарот, којшто е лоциран во објект на старата касарна во атарот на Долна Бањица, денес официјално беше пуштен во употреба. Располага со триесет боксови за животните, а во период од пред две недели, веќе се заловени петнаесетина кучиња, за кои следува соодветно вакцинирање, стерилизирање и кастрирање.

Првиот човек на Гостивар, Арбен Таравари вели дека во период од две години на гостиварска територија биле третирани околу 470 кучиња.

„А ко ме прашате мене, јас се` уште не сум задоволен од резултатот на работите за коишто се залагме како локална власт за проблемот со бездомните кучиња. Во 2018 направивме физибилити и според проценката во Гостивар има околу 700 кучиња. Ако има толку, а третирани се веќе скоро 500, значи ставени под контрола, излегува дека преостанати без третман се 200, што сметам дека не е така. Мислам дека проблемот е во недобрата соработка со полицијата, која треба да презема мерки за носењето на кучиња од другите градови. Сме укажувале на тоа многу пати, имаме и снимки од граѓани коишто го докажуваат тоа.“, изјави градоначалникот.

Новиот стационар се реализира како проект “Дај ми засолниште за спас” на Иницијатива за граѓански интеграции, во рамките на Регионалната програма за локална демократија во Западен Балкан- ReLOaD, која е финансирана од Европската унија, а ја спроведува Програмата за развој на Обединетите нации (УНДП).

„Има уште многу работа, но ние го направивме првиот чекор. Да напоменам дека во дирекна средба со претставници на полицијата и општината беше договорено да се преземат итни мерки за справување со проблемот на носење на бездомни кучиња од другите градови, со што полицијата се обврза на поинтензивни проверки и контроли, а упатуваме и апел до граѓаните ако забележат таква појава, да ја пријават. До сопствениците на миленичиња апелираме да не ги напуштаат, да ги чуваат и редовно да ги вакцинираат, а доколку не можат повеќе да ги чуваат може да ни се обратат, стационарот ќе биде отворен за нив. Исто така, ги повикуваме граѓаните да ги отворат своите домови за животните од стационарот, да ги вдомат, а секако тие ќе им возвратат со голема љубов“, рече Анета Филипоска, проект координатор.

Билјана Ѓеорѓиевска, проект менаџер од УНДП истакна дека проектот е реузлтат на барањата и потребите на граѓаните. „Во април 2019-та имаше јавна дебата на која граѓаните и граѓанските организации ги дефинираа приоритетите за Гостивар и токму нападите од кучињата беа посочени како еден од проблемите со коишто често се соочуваат граѓаните, а од друга страна и потребата да се обезбеди хуман третман на животните. Се надеваме дека со овој проект, колку толку ќе придонесеме за справување со проблемо“, изјави Ѓеорѓиевска.

Проектот ќе трае во наредните пет месеци, по што обврската за функционирање на стационарот и вработените ќе ги преземе општината.