Разрешен директорот на болницата во Гостивар, кој ќе биде назначен за в.д.?

Министерот за здравство Арбен Таравари го разреши директорот на општата болница во Гостивар, Илбер Адеми. Информацијата ја потврдија од Министерството за здравство, а и самиот Адеми преку пост на социјалните мрежи.

„Би сакал да им се заблагодарам на сите вработени, главните сестри, раководителите на различните сектори и сектори за поддршката и соработкат. Беше чест и задоволство да се работи со таков посветен и професионален тим. За време на мојот мандат заедно со мојот тим работевме напорно и реализиравме многу важни капитални проекти кои се во интерес на граѓаните, пациентите и вработените во нашата болница.“, напиша Адеми.

Кој ќе ја наследи раководната фотелја во гостиварската болница ќе се знае следната недела. Според информациите на Gostivarpress.mk во игра се неколку кандидати, а конечната одлука ќе биде донесена од понеделник натака. Тоа што е сигурно е дека назначувањето, до отворање на нов конкурс ќе биде како в.д. (вршител на должност).

Министерот Таравари денес во однос на новинарско прашањето дали ќе има нови разрешувања или назначувања, информираше дека од понеделник ќе започнат со нови назначувања.

„Назначување немаме, од разрешување – 13 се досега разрешени. Сите по клиники не ги паметам, меѓутоа, можеби до крајот на идната недела ќе бидат сите, се надеваме, ако помине Предлог-законот што е поднесен во Влада. Назначувања нема освен Онкологија, Токсикологија за тоа што сте информирани. Од понеделник ќе почнеме со нови назначувања“, рече тој.