Родител на ученик во медицинско Гостивар: Има премногу деца во класот, ризикот од вирусот е голем

Реџепали Ѓапи, родител на ученик во средното медицинско училиште во Гостивар јавно изрази загриженост за безбедноста на своето дете во однос на коронавирусот, додека посетува настава. Таткото вели дека во паралелката кадешто учи детето, бројот на ученици е преголем, поради што не е можно да се одржува дистанца и да се запазат протоколите.

„Нема ни 10 сантиметри растојание од ученик до ученик. Тоа е преголем ризик. Внатре е како гасна комора. Како може да се почитуваат протоколи на толку многу деца, 45 ги има во еден клас. Едно да се зарази, сите треба во карантин да одат. Како може да велат ги заштитуваме децата, кога во такви услови нема никаква заштита. Барам да се реагира, помош барам. Моето дете со страв оди на училиште секој ден“, рече родителот, чие дете е трета година.

Директорот на училиштето Елбаш Абази демантира дека во паралелките има толкав број на ученици и тврди дека протоколите кои се дадени од Министерството за образование се почитуваат. „Во паралелките има до 35 ученици максимум, нема клас со 45 деца. Се‘ што е во наша надлежност и можност правиме и протоколите кои се пропишани од надлежните се спроведуваат. Други родители до сега не реагирале за нешто слично“, рече директорот.

Педагогот во училиштето Шпенд Бајрами рече дека е резбирливо што враќањето на настава со физичко присуство може да донесе страв кај некои родители, но дека мерките за заштита се применуваат. „Имаме 8 лекари во училиштето кои отвораат четири очи за децата да бидат безбедни, се внимава на дистанца, хигиена, носење маски. Учениците сакаат да посетуваат настава со физичко присуство, а тоа се покажа и со фактот дека минатата недела имаше и одреден бојкот на онлајн наставата“, рече Бајрами.

Родителот случајот го пријавил и во Просветниот инспекторат во Гостивар и очекува соодветна реакција.