„Сакај ме-разбери ме-прифати ме“ – Работилница во Гостивар посветена на аутизмот

Одделението за социјална заштита, здравје и детска заштита при општина Гостивар денеска организираше работилница посветена на раното откривање на аутизмот и предизвиците кои ги носи оваа состојба за семејствата и заедницата.

„Целта на оваа работилница е да им понудат бесплатни совети на родителите и на сите лица со аутизам, да се помогне во рано идентификување на симптомите и да се укаже кои чекори и мерки треба да се преземат за полесно справување“, рече Имерлие Салиу од одделението.

Пред присутните зборуваат дефектолозите Самир Грбле и Зумрета Џемаили, психологот Самије Вејсели, како и Афердита Хамза, раководител на Одделението за социјална заштита, здравје и детска заштита. Учесниците имаа можност да им поставуваат прашања на стручните лица околу полесно разбирање на аутизмот, да добијат релевантни информации за терапијата, процесот на лекување и совети како полесно да ги надминат тешкотиите со кои се соочуваат децата и лицата со аутистичниот спектар.

Во Гостивар за децата со аутизам функционира дневен центар „Blue puzzle“ чии стручни услуги ги користат триесетина деца.