Се‘ што треба да знаете за варени јајца/Калории, бенефити, ризик…

За Велигден секоја православна куќа има вапсани варени јајца. Традицијата, освен кршење на јајцата меѓу членовите на семејството и гостите кои доаѓаат, налага и нивно подарување, што значи дека во домот може да се соберат многу велигденски јајца. Има разни рецепти во кои можете да ги употребите, салати, главни јадења, прилози или едноставно да ги посолите и да ставите црн бибер. Сепак, не е лошо да се знае нешто повеќе околу нивната калорична вредност, колку се добри и во кои случаи носат ризик за здравјето.

Калории:

Едно јајце содржи околу 70-80 калории, што ги право совршена храна за луѓето што сакаат да ја одржуваат тежината или да држа здрави диети.

Бенефити:

Варените јајца можат да помогнат за целокупно зајакнување на организмот. Тие се одличен извор на: железо, фосфор, селен, калциум, како и на витамин D, протеини и здрави масти. Холинот во јајцата е незаменлив за мозокот и меморијата. Според истражувањата, луѓето кои јадат по едно-две варени јајца на ден го намалуваат вкупниот внес на калории во текот на денот, бидејќи јајцата придонесуваат за долготрајно чувство на ситост и штитат од желба за консумирање на штетна храна. Исто така, го зајакнуваат коскениот систем, придонесуваат за градење на мускулите, активираат процеси во мозокот, го зајакнуваат имунолошкиот систем.

Благодарение на завидното количество витамин D во јајцата, имунолошките одбрани се зголемуваат. Калциумот во нив пак се апсорбира многу поквалитетно повторно благодарение на витаминот D, кој го катализира овој процес.

Варените јајца се многу корисни и за бремени жени, особено оние кои треба да почитуваат диета за време на бременоста. Тие треба да ги јадат секој ден, бидејќи му ги даваат на организмот, како и на плодот, неопходните хранливи материи.

Совети околу варењето на јајцата:

• Големината на садот треба да биде таква што јајцата ќе се постават едно до друго без многу простор меѓу нив.
• Пред да ги ставите да се варат јајцата нека отстојат 1-2 часа на собна температура.
• Додадете малку сол во водата за да не пука лушпата
• Тазе јајца треба да се варат 3-4 минути подолго

Ризици:

Нутриционистите напоменуваат дека не смее да се претера со јадењето на варени јајца. Жените може да изедат по две, а мажите по три јајца во еден ден. Децата кои се физички поактивни, исто така може да јадат по три варени јајца дневно. Се‘ што е повеќе од дозволеното носи ризици по здравјето. Исто така, луѓе кои се алергични на јајца никако не смеат да ги консумираат.

Важно е да се знае дека според препораките на нутриционистите, варените jajца може да ги јадете 5 до 7 дена од денот на варење, но само ако да ги чувате во фрижидер или на ладно место.