Сеќавање на хероите – Шест години од смртта на Горан и Ненад

Денес се навршуваат шест години од крвавите кумановски настани во населбата „Диво насеље“, каде животот го загубија осум македонски бранители, меѓу кои Горан Илијевски Мече од Гостивар и Ненад Серафимоски од гостиварско Зубовце. За Гостивар 9-ти мај 2015-та година, останува ден на голема загуба и жалост. Во Горан и Ненад учествуваа во полициската акција, првиот како припадник на единиците за брзо распоредување, а вториот како припадник на специјалната единица Тигри.

Илијевски имаше 41 година, а во МВР беше вработен од 2002 година. Неговите сограѓани го паметат по ведриот дух и како еден од главните иницијатори за возобновување на манифестацијата Водици во Гостивар. Серафимоски, познат како голем спортист и професионалец, загина на 28 годишна возраст.

Вооружената престрелка во Куманово започна рано утрината во 4:30 часот и траеше речиси непрекинато 28 часа. Животите ги загубија: Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ. Загинатите бранители постхумно беа одликувани со „Медал за храброст“.

„Шест години непребол и сеќавање нашите колеги, хероите од кои ги положија животите во Диво Насеље, шест години од еден од најтрагичните настани кои оваа земја ги памети. Датум завиен со црна лента во нашата историја, датум кога изгубивме осум колеги,осум херои ги жртвуваа сопствените животи за да ги заштитат граѓаните на браникот на татковината. Македонскиот полициски синдикат како единствен репрезентативен синдикат во МВР  уште еднаш апелира и  ја потсетува целокупната јавност дека припадниците на полицијата се тука да ги штитат граѓаните и уставниот поредок на државата и не смеат никогаш да бидат жртви на никакви поинакви интереси. Сите ние, колегите од Македонскиот полициски синдикат, вработените во МВР како и сите граѓани секогаш ќе ја паметиме нивната храброст и секогаш ќе се сеќаваме на херојството.“, напишаа од Македонскиот полициски синдикат по повод годишнината од кумановските настани.

Жарко Кузмановски с. Брвеница;

Ненад Серафимовски с. Зубовце;

Сашо Самојловски ,с. Брвеница;

Бобан Ивановиќ,Скопје;

Горан Илијевски,Гостивар;

Исамедин Османи,Скопје;

Љубиша Аранѓеловиќ, Скопје;

Горан Стојменовиќ,Скопје.