Села од Гостивар со порака до премиерот Заев: Големите изјави за едно општество за сите се само лага

Претседателот на Алијанса за Албанците Зијадин Села денес го посети градоначалникот на Гостивар Арбен Таравари, кој е и генерален секретар на партијата. Во својата изјава Села се обрати до премиерот Зоран Заев, со порака дека гостиварци се исклучени од концептот „Едно општество за сите“ кое според него е само голема лага.

„Со  директни наредби од премиерот, заедно со коалициониот партнер прават се за да го блокираат градоначалникот и граѓаните, преку неставање на буџетот на дневен ред. Граѓаните на Гостивар се пример дека големите изјави на премиерот за едно општенство за сите и живот за сите во Македонија се само лага зад која се кријат ниски политички игри на СДСМ и на коалициониот партнер ДУИ“, изјави Села.

Градоначалникот Таравари потенцира дека Алијанса за Албанците е доминантна партија во полошкиот регион на што како партиско раководство биле горди.

Денешната агенда на посети Села и Таравари ја продолжија заедно во општините Боговиње и Врапчиште кај сопартијците градоначалници.