Семинар во Гостивар: Над 500 учителки се обучуваа за успешни часови по физичко

Повеќе спортување и физичка активност за добро здравје и правилен раст и развој на децата. Ова беше пораката испратена од денешниот семинар по физичка култура што се одржа во Гостивар. Семинарот беше наменет за одделенски наставници од училиштата во Гостивар, Тетово, Дебар, Кичево, Центар Жупа и Македонски Брод.
Настанот го организираше Бирото за развој на образованието во соработка со Факултетот за физичка култура од Скопје. Вежбите што наставниците треба да ги вметнат на часовите по физичко воспитување ги демонстрираа токму професори од Факултетот.

„ Децата во денешно време малку спортуваат и не се физички активни, затоа часовите по физичко се многу важни за нивното здравје и спречување на разни деформитети“, изјави Александар Туфекџиески, професор на Факултетот за физичка култура и еден од предавачите на семинарот во Гостивар.

Вакви настани се организираат во сите региони низ Македонија и со нив се планира да бидат опфатени околу 4.000 одделенски наставници.