Шестмесечен извештај – Една жртва, четиринаесет тешко повредени во гостиварско

Во првите шест месеци од оваа година, на поширокото гостиварско подрачје регистрирани се вкупно 130 сообраќајни несреќи, што е 11 повеќе од истиот период лани. Според анализите на полицијата, повеќе од половината несреќи, вкупно 77 се случиле во населено место, а останатите на отворен пат.

Во сообраќајките животот го загубило едно лице, додека четиринаесет  завршиле со тешки телесни повреди. Најголемиот дел од нив биле сопатници, а имало и тројца велосипедисти и двајца пешаци. Триесет и шест лица се здобиле со полесни телесни повреди. Во 79 несреќи причинета е само материјална штета.

Најголемиот број од несреќите се случиле на гостиварските улици, потоа на магистралниот пат кон Кичево, автопатот Гостивар-Тетово и регионалните патишта кон селата Чегране и Градец.

„Како и до сега, неприлагодената брзина е најчестата причина за судири или излетувања на возилата од коловоз. Причина број два е неправилното вршење дејствие,  непочитување првенство, недржење страна и друго“, соопштуваат од СВР Тетово.

Нивна оценка е дека продолжува сообраќајната недисциплина, пред се од возачите, но и од пешаците, кои не ги почитуваат постоечките знаци, правила и прописи.

Секторот за внатрешни работи најавува дека ќе продолжи со засилени превентивно-контролни активности, и во наредните месеци. Нивна примарна цел е навреме да се откријат и отстранат од сообраќај прекршителите и да придонесе за поголем ред и безбедност на патиштата, велат од полицијата.