Свечена промоција на матураните од економско во Гостивар: Радост, возбуда и желби за успеси и среќа!

Денешниот ден за генерацијата 2020/2024 година, која излегува од клупите на средното економско училиште во Гостивар помина во свечена атмосфера, со радост, возбуда и споделени желби за успеси и среќа. Четиригодишното средно образование на матурантите беше заокружено со заедничко дружење, нивна промоција и симболично фрлање на капите.

„Почитувана генерацијо, пред вас се отвора бескрајно пространство на иднината, професорите ви дадоа крилја и ви го покажаа патот, а предизвикот е ваш. Вие сте оние кои треба широко да ги отворите крилјата и да се вивнете кон вашиот сон. Не велам дека нема да паѓате, но важно е да се исправите и да продолжите понатаму. Целта ве очекува. Не заборавајте, младоста е пролет на една личност во која се сее семе за идните години од животот.“, беше речено во воведниот дел на свеченоста.

Задоволството и радоста се споделија со професорите, родителите, претставници од општината, пријатели и други гости. Во име на училиштето, директорот Михајло Ѓиноски им посака среќа и успех во натамошниот живот.

„Четири години поминаа брзо, сите денови беа различни, исполнети со убави нешта и изненадувања и предизвици пред кои сите заедно излеговме поуспешни и поискусни.  Животот ќе се однесе по различни патишта, но сигурен сум дека секогаш ќе се сеќавате на средношколските денови поминати тука. Ви посакувам многу среќа во вашиот живот и исполнување на сите желби и поставени цели“, рече Ѓиноски.

Матуранти од трите наставни јазици добија признанија како најистакнати ученици на генерацијата, прогласени од страна на наставничкиот совет: Лена Павловска, Гонџа Сулејмани, Ајберк Махмуди.

Фрлањето на капите во воздух, симболично го означи завршувањето на средното образование на оваа генерација од средното економско училиште во Гостивар.