Талибанците забранијa жените да одат на факултет во Авганистан

Талибанските власти донесоа наредба со која жените не смеат да одат на универзитет на неодреден период, се вели во писмото на Министерството за високо образование испратено до сите универзитети во Авганистан.

Портпаролот на Министерството за високо образование, Хафиз Зија Хашами, рече дека наредбата е официјално доставена до сите универзитети и стапува на сила веднаш и дека е во согласност со, како што наведе, одлуката на талибанскиот кабинет.

Новото правило речиси целосно го ограничува пристапот на жените до формално образование, бидејќи тие се веќе исклучени од повеќето средни училишта. Пред три месеци илјадници девојчиња и жени се пријавија да полагаат приемен испит низ Авганистан.

Откако Талибанците ја презедоа власта минатата година, жените и мажите се разделени во различни училници и влегуваат во зградите на факултетите одделно. Талибанските власти првично го ограничија списокот на факултети на кои жените можат да се запишат, со што го забранија студирањето ветеринарна медицина, инженерски науки, економија, земјоделство и особено новинарство. По што сега целосно го суспендираат пристапот до високото образование за студентките.

Последната забрана секако ќе предизвика загриженост кај меѓународната јавност. САД и другите западни земји поставија услов дека ќе го признаат талибанското владеење во Авганистан доколку се подобри пристапот на жените до образованието.

Талибанците, кои се вратија на власт во август 2021 година, ветија дека ќе бидат пофлексибилни, но во голема мера се вратија на строгото толкување на исламот што го одбележа првиот период од нивното владеење од 1996 до 2001 година.