Тажна вест: Почина актерот Ванчо Петрушевски

На 67 годишна возраст денес почина познатиот македонски актер Ванчо Петрушевски. Причината за смртта се уште не е објавена, а неофицијално актерот животот го загубил во трагичен настан.

Ванчо Иван Петрушевски е роден во Скопје, 1951 година. По завршувањето на Високата музичка школа – Отсек за актерски кадри во Скопје, во 1975 година се вработува во Драмски театар – Скопје, каде неговиот талент го истакнува веќе во првата претстава „Ослободување на Скопје“ од Д. Јовановиќ. Особено интересни и целосни карактери Петрушевски остварува во комедии и проекти наменети за деца. Учествува во голем број радио-драмски проекти, телевизиски драми, серии, филмови и друго.

Добитник е на многу награди: награда „Димче Трајковски“ за епизодна улога на Тетарските игри „Војдан Чернодрински“ – Прилеп , Најпопуларно ТВ лице за 1987 година, Награда за најдобро актерско остварување на филм и телевизија, Награда за најдобро актерско остварување на Театарските игри „Војдан Чернодрински“ – Прилеп, а во 2016 ја добил и Наградата 23 Октомври за животно дело.