Трибина на Левица во Гостивар: ,,Бојкотот како самоодбрана”

Во Центарот за култура АСНОМ во Гостивар, во сабота (8 септември) во организација на Левица ќе се одржи отворена политичка трибина на тема ,,Бојкотот како самоодбрана”. На трибината најавено е учество на членовите на Президиумот на партијата: Џејлан Велиу, Зоран Василески и Хактан Реџеп Исмаил.

„Во отсуство на јавни дебати и расправи, за исклучително важни политички теми, ,,Левица” уште еднаш ќе се обиде да го пополни демократскиот вакум, создаден на политичката сцена во Македонија и да одговори на горливите прашања што со себе ги носи политичката реалност. Бојкотот на претстојниот државен консултативен референдум, како единствен механизам за самоодбрана, билатералниот договор за името со Грција, како и потенцијалното влегување на државата во воено-милитаристичкиот сојуз НАТО, ќе бидат само дел од точките за кои јавно ќе се говори на трибината.“, наведуваат од партијата.

По излагањата на учесниците на трибината, ќе следува отворена дискусија на која присутните ќе можат активно да се вклучат со прашања кон говорниците. Од политичката партија ,,Левица” и Локалниот огранок во Гостивар, ги повикуваат граѓаните да присуствуваат на настанот. Трибината ќе се одржи во малата сала со почеток во 12 часот.

(комерцијална објава)