Ученици, професори, родители и стручни лица во Гостивар дебатираа на тема „Насилство меѓу младите“

Кои се причините кои доведуваат до насилно однесување на младите, како тоа може да се спречи и на кој начин институциите треба да делуваат во таа насока. Ова беа темите на кои се разговараше на дебатата на тема „Насилството меѓу младите”, во средното економско училиште во Гостивар, која ја организираше Габриела Петроска, професор по македонски јазик.

На настанот учествуваа средношколци, родители, професори, претставници од Центарот за социјална работа, невладиниот сектор и полицијата.

„Поради фактот што насилството меѓу младите е актуелна и сензибилна тема, сакавме да и пристапиме сериозно и од сите аспекти. Се надеваме дека преку изнесување на мислења и ставови и споделување на искуства ќе се подигне свеста кај сите за поголемо внимание кога станува збор за насилното однесување“, рече Петроска.

Како заклучок од дебата беше изнесено дека во основата на насилното однесување кај децата лежат првенствено односите и состојбите во семјството, па потоа во училиштето и општеството во целина. Анализите покажале дека во изминатите години се бележи намалување на случаите на насилство меѓу младите, за што голема улога имаат проектите и активностите кои се преземаат на таа тема.