Униите на жени на ВМРО-ДПМНЕ и АА во Гостивар заедно на марш „Напред розово!“

Во организација на Унијата на жени на ВМРО-ДПМНЕ во соработка со Унијата на жените на Алијанса за Албанците во Гостивар, попладневно се одржа настан по повод месецот за борба против рак на дојка, октомври. Под мотото „Напред розово“, жените заедно маршираа од пред Центарот за култура до градскиот плоштад, од каде ги испратија своите пораки за повисока свест за редовни превентивни прегледи и поддршка на секоја жена што се соочува со болеста.

„Целта ни е да ја подигнеме свеста, моралот кај жените, а со тоа и да ги поттикнеме на редовна контрола, редовни прегледи, самопрегледи кои се мнлгу битни во раната дијагноза, превенцијата, рано преземање на мерки, терапија и сето тоа води до позитивен исход од дијагнозата, односно оздравување и победа над оваа опака болест. Како лекар сакам да нотирам дека за да имаме навремена дијагноза потребно е да имаме и навремени испитувања. Затоа апелирам да се надминат слабостите кои ги имаше во текот на изминатиот ковид период, да има што е можно повеќе слободни термини за прегледи, за да можат жените непречено да ги вршат повие прегледи. Исто така, на Гостивар му е повеќе од потребно да се обезбеди мамограф, затоа што мамографијата е најточна метода, преку која може да се дијагностицира карциномот на дојка и без симптоми. Гледате дека овде сме присутни жени од различна возраст, етникум, политичка припадност, професија и ова е еден вид порака, апел дека карциномот на дојка не бира, секој може да заболи, но со вакви настани, со едукација и подигнување на моралот да не дозволиме ниту една жена да стане жртва“, порача Анета Ќироска, претседател на УЖ на ВМРО-ДПМНЕ во Гостивар.

Беса Мухареми, претседател на УЖ на АА во Гостивар ги повика жените да бидат внимателни и одговорни кон своето здравје.

„Во духот на месец октомври, како што симболично е наречен „розов месец“ придонесуваме за сензибилизирање на јавноста за карциномот на дојка. Оваа болест може да ја погоди било која жена, па и мажите, не бира по националност, раса, религија. Порачуваме секој да мисли и да го чува своето здравје, да се прават редовни прегледи и контроли за да доколку е потребни навреме се преземат соодветни мерки“, истакна Мухареми.

Поддршка на активноста даде кандидатот за градоначалник на Гостивар од Алијанса/Алтернатива, Арбен Таравари.

„Карциномот на дојка е една од почестите болести што се јавуваат кај жените, но може да се превенира и тоа е главната порака на ваквите настани, превенцијата, повисока свест за рани прегледи. За жал во нашата болница се‘ уште не се исполнети во целост условите за превенција, да биде како што треба за жените што се соочуваат со карцином и за оние на кои им се неопходни прегледи“, рече Таравари.

На настанот присуствуваа и носителите на советничките листи на ВМРО-ДПМНЕ и Коалицијата ,,За подобра Македонија“, Гоце Димовски и на Алијанса/Алтернатива, Ваљбон Лимани.