Урнебес во Младост, „падна“ Куманово (91:83)

Силна битка се водеше вечерва во „Младост“ помеѓу екипите на Гостивар и Куманово за нови 2 бода од Првата македонска кошаркарска лига.

Знаејќи го фактот дека Куманово традиционално важи за незгоден противник и дека гостиварци не се во најдобра форма и понатака без плејмејкерот Вокер, се наговестуваше израмента борба во натпревар важен и за двете екипи, но ни одблиску не може да ја претстави точната сликата што се случуваше вечерва во Младост.

Гостиварци сигурно влегоа во натпреварот задржувајќи го противникот на 0 поени повеќе од 3 минути, но гостите лесно ја анулираа разликата за на крајот на првиот период резултатот да биде скоро изедначен 21-20. Со поените на Јанески, Димчевски и Фрајдеј во вториот период гостиварци остварија солидна разлика заминувајќи на полувреме со +7, (48-41).

Дури во вториот дел избраниците на Мирковски како да се освестија и одиграа феноменални 10 минути во кои ги надиграа домаќините во сите сегменти, принудувајќи ги на некои почетнички грешки, дозволувајќи само 8 поени во нивниот кош, добивајќи ја четвртината 8-25.

56-66 имаше екипата на Куманово на почетокот на последните 10 минути, нервозата почна да владее во Младост, секоја грешка беше громогласно коментирата, секој поен искрено прославен од играчите на двата клуба и дваесетина присутни лица на огромните празни трибини во Гостивар. Џалоун Фрајдеј покажа дека е врвен професионалец и неговите 4 поени по ред внесоа надеж дека натпреварот не е изгубен, за после тоа гостиварци да распукаат од сите позиции, Костоски во неколку наврати немилосрдно стрелаше за три од повеќе од 10 метри, Фрајдеј со чиста тројка и забивање само го одржуваше налетот на „бело-сините“ за со тешките и важни поени на Димитриевски и Тодоровиќ, КК Гостивар изброи дури 35 поени во кошот на Куманово, гостите немаа одговор на ваквата игра, периодот заврши +18 за домаќините, поставувајќи го конечниот резултат 91-83.

Голема победа за гостиварскиот прволигаш во една од најтешките кошаркарски сезони кои ги памети кошарката во светот. Ваква спортска борба, ваков натпревар, пред празни трибни, навистина жално.

Костоски и Рос беа најефикасни на натпреварот со 24 поени, Фрајдеј запиша 22, Димчевски 15, Тодоровиќ 13, Јанески 10, Димитриевски 5, Штерјов 2 поени. Покрај Рос, кај Куманово расположени беа и Ливингстон запиша 19 и Џекиќ 14 поени.