Уште еден успешен тест на гостиварци – КК Гостивар : Голден Игл (88:70)

Кошаркарскиот клуб Гостивар, денеска одигра уште еден, трет по ред тест натпревар во подготвителната фаза пред почетокот на претстојната сезона, која ќе започне на 5 октомври.

Овој пат во Младост гостуваше вицешампионот на Косово, екипата на Голден Игл, која гостиварци ја совладаа со резултат 88:70.

Пред повеќе од 400 гледачи во Младост, добра игра прикажаа и двете екипи. Гостите од Косово се покажаа како цврст и агресивен противник, резултатот беше скоро изедначен се до средина на втората четвртина кога „бело-сините“ со серија на тројки успеаа до стигнат до двоцифрена предност, која сигурно ја одржуваа до крајот на натпреварот.

За „бело-сините“ успешна премиера имаше најновото засилување Ѓорѓе Џелетевиќ, кој само после еден одработен тренинг со екипата на Гостивар, остави силен впечаток на теренот.

На натпреварот во Гостивар присуствуваа и претставниците на КФСМ, претседателот Перо Антиќ, спортскиот директор Тодор Гечевски, придружувани од потпреседателот Бајрамали Саити.

[unitegallery gallerykk catid=3]