Утре почнува Галичник Филм Фестивал

Второто издание на Галичник Филм Фестивал почнува утре (5 август) и ќе трае до 8 август. Во рамки на фестивалот ќе бидат прикажани 26 краткометражни филмови во три категории: игран, документарен и анимиран. Филмските проекции ќе се прикажуваат под отворено небо во амфитеатарот Упија.

Фестивалот има натпреварувачки карактер. Добитникот на Оскар за најдобар краткометражен филм, “Кожа” на режисерот Гај Натив и номинираниот за Оскар “Собата за писма” на режисерката Елвира Линд се само дел од врвните филмски достигнувања кои се борат за главната награда, велат организаторите.

Галичник Филм Фестивал ќе биде отворен со филмот “Налепница” по сценарио и режија на Георги М. Унковски, а првата фестивалска вечер ќе биде заокружена со настап на „Летечки пекинезери”.

Фестивалот го организираат Дарма Филм и Месната Заедница Галичник, со финансиска поддршка од Агенцијата за филм и Делегацијата на Европската Унија Скопје.