Велосипедска трка и поетско читање во Гостивар во хуманитарни цели

Викендов што измина младите волонтери од гостиварскиот Црвен Крст го искористија за организирање на два хуманитарни настани.

Во саботата во летниот амфитеатар се одржа манифестација под наслов “Гостивар чита“, на која се читаше поезија и беа собрани книги и лектири кои ќе се донираат за училишните библиотеки. „Целта ни беше да ја поттикнеме младата популација на заеднички живот и промовирање на културата на дијалог како основен предуслов за создавање на интеркултурно општество“, велат од Црвениот Крст.

Вториот настан беше организиран во недела. Станува збор за велосипедска трка под мотото “Здравјето е богатство” со цел младите да се поттикнат на здрави навики и поактивен живот. Велосипедската трка почна од пред гимназијата во Гостивар, а заврши пред Хидроцентралата во селото Вруток. Со парите собрани од партиципацијата за учество во трката, ќе се обојат старите места за паркирање на велосипеди во училиштата, а во оние каде што нема, ќе се стават нови.

Активностите се спроведоа во рамки на Програмата за промоција на хумани вредности.