Викендов во Минхен започнува 185-тиот Октоберфест

Најголемиот фестивал на пивото во светот, „Октоберфест“ викендов го започнува своето 185-то издание во Минхен.

На 22 септември, точно на пладне согласно традицијата градоначалникот на Минхен со чекан прв отвора буре со пиво, со што започнува фестивалот. Во главниот град на Баварија во наредните 16 дена се очекуваат околу шест милиони посетители кои ќе бидат дел од панаѓурот кој се простира на 30 хектари површина на минхенската Терезиен-ливада. Најголем дел од посетителите на Октоберфест 70% се од Баварија, доаѓаат во традиционална баварска облека, како што се кожените пантолони (ледерхозе) и женскиот фустан (дирндл), останатите 30%, од сите страни на светот.

На „Октоберфест“ може да се служат само локални пива, т.е. пива произведени на територијата на градот Минхен. Пивата кои ги задоволуваат посебните критериуми се означени како „пива на Октоберфест“. За потребите на фестивалот, пиварниците произведуваат посебен вид пиво, кое има повисоко ниво на алкохол од најмалку 13,5%, наместо вообичаеното ниво од 5,8% до 6,4%  дозволени пива се: Augustiner-Bräu, Hacker-Pschorr-Bräu, Löwenbräu, Paulaner, Spatenbräu и  Staatliches Hofbräu-München.

Цената на пивото на годинешниот фестивал, кое се служи во кригли од 1 литар се очекува да се движи од 10 до 11,5 евра за кригла.

Октоберфест не може да се замисли без традиционалната храна: ’’Hendl’’ (пилешко месо) , ’’Schweinsbraten’’(печено свинско) ,’’Haxn’’ (свинска коленица) , ’’Würstel’’ (колбаси) заедно со ’’Brezel’’ (переци), ’’Knödeln’’(компири или лебни кнедли) , ’’Käsespätzle ’’ (сирењаци) , ’’Reiberdatschi’’(компир – палачинки), ’’Obatzda’’ (масно вариво зачинето со сирење и путер) и ’’Weisswurst’’ (бел колбас).

Октоберфест за прв пат се одржал на 12-ти октомври 1810 година во чест на одбележувањето на бракот на трононаследникот Лудвиг и принцезата Тереза фон Сахсен-Хилдбургхаусен.

Оваа година се засилени безбедносните мерки. Дополнително поставени се огради, видео-камери, забранети се дронови, како и носењето големи чанти и ранци од посетителите. Околу 700 полицајци ќе се грижат за сигурноста на луѓето присутни таму.