Во Гостивар одбележани 76 години од Февруарскиот поход

Со пригоден собир и положување на цвеќе во Гостивар денес беа одбележани 76 години од борбените операции од народноослободителната борба, познати како Февруарски поход. Настанот го организираше Сојузот на борци, пред споменикот на народниот херој Чеде Филипоски-Даме, кој и самиот бил учесник во походот.

„Тој февруари 1944 година, како да се здружил со фашистите против голораките борци, пишува Киро Сотироски Строгов и самиот учесник во походот. Имало снежни виулици, јак студ, а борците слабо облечени, со дотраени обукви, без доволно храна, но со голема љубов и гордост чекореле напред. Учесниците во овој поход биле претежно млади луѓе, но свесни за големината на времето, подготвени да жртвуваат се` за слободата“, рече во обраќањето Радислав Ѓиноски, претседател на Сојуз на борци Гостивар

Гостивар дал значаен придонес во Народноослободителната војна на Македонија. Во Февруарскиот поход од `44 година, учествувале 40 борци од гостиварскиот регион. Неколкумина од нив го загубиле животот во борбата против окупаторот и тоа: Злате Малакоски, Васил Василески, Борче Јованоски, Крсте Гиноски, Слободан Пепоски, Светозар Спироски и Денко Дејаноски.

Присутните на денешното одбележување им оддадоа почит на борците со едноминутно молење.